Reiseberichte von Petra

28. Februar 2010

D'Martina isch am 25. Dezember leider heigfloge
so sind d'Nicole vo Holland und ich ines Zweierzimmer umzoge.
Nur hends ues bi dere Glegeheit au grad gseit:
"am 31. Dezember sind scho alli Zimmer beleit!"
Ui nei, das hettemer eus ja choenne daenke
und au die andere Hostel hend kei foehrigi Zimmer z'verschaenke...
Doch ploetzlich hemmer eus gseit, es isch ja eh es riese Faescht,
wer brucht denn i dere Nacht scho es Naescht?!!?
So hemmer euses Gepaeck igstellt
und fuer de 1. Januar wieder es Zimmer bstellt.
S'erwartete Faescht hemmer denn au atroffe,
alli Luet sind i dere Nacht naemlich uf de Plaza gloffe.
Klar hend au alli welle Rakete ablah,
doch ned jede hed Freud gha do drah...
Vo Sicherheitsabstand hends naemlich nuet welle wuesse
und so maenge heds gschafft, id Menschemengi z'schuesse!
Es super Erlaebnis isch es trotzdem gsi
und uesi obdachlosi Nacht isch im Nu verbii =)

Apropos wohne, ich bin jetzt inere Familie undercho,
oberherzlich hends mich det ufgnoh.
Sie bemuetered mich zwar fasch chli z'fescht,
aber so fruendlich sind da alli mit ihrne Gescht.

Under de Wuche musi jewils frueh ufstah,
wil mer mit siebe Chind vom Heim zum Ferie-Sportagebot tuend gah.
Det choend sie sich so richtig ustobe
und fuer d'Abschlussdarbuetig sechs Wuche spoeter probe.

Zur Arbeit fahr ich 30 Minute mit em Chlibus, gnennt Combi,
das isch immer so unterhaltsam, die Zyt gad im Nu verbi.
Es happered zwar chli a Beifreiheit und Sicherheit,
ich hoffe nur, dass nie oeper usegheit...
So chunt zum Bispil en bereits volle Chlibus
und de "Busjunge" rueft: "Mer hend no Platz im Ueberfluss!"
Die eine Bues sind so niedrig, das ich mer fasch im Sitze tue de Chopf aschlah,
so choend ihr euch vorstelle, wie bequem's isch, wenn i somne Bus muesch stah!!
Ueber de Pris chamer defuer ned reklamiere,
fuer nur 20 Rappe tuends di da umechauffiere.
Vowaege Busgeld gits no e witzigi Gschicht z'verzelle;
da mer taeglich mit de Chind per Bus zum Ferieagebot goend, tuemmer de Busjungs e zuenftigi Rechnigsufgab stelle:
5 Minute brucheds zum Teil fuer die Ufgab,
obs de stimmt, isch e gueti Frag...
Falsch lige tuend naemlich sicher 90 Prozent,
wo d'Rechnig "7 Kinder á 40 und 2 Erwachsni á 60 Centimos" ned kennt.
Das so ersparte Geld tuemmer de ame spare
und wenn ame andere Tag alli Bues uebervoll sind z'nuente imne Taxi heifahre.

S'Wetter macht da taeglich was es will,
zum Teil choemed Baech d'Strass durab, es isch eifach z'viel!
Mer choent meine wenigstens en Regeschirm wuer oepis nuetze,
aber da irrt mer sich ghoerig, denn d'Autos tuend vo unde her spruetze!

Vilicht henders scho vode Nachrichte vernah,
zur Zyt heds so viel Rege wie sit Jahrzehnte nuemme da.
Zersch het mer denkt, s'isch guet fuer d'Landwirtschaft,
doch das Wasser hed eifach z'viel Chraft...
D'Strasse bis Machu Picchu sind vo Erdruetsch zerstoert,
ca. 2500 Touris werdet vo dete mit em Heli usgfloge, hain ghoert.
Ganz viel Peruaner hend kei Wohnig meh
und au Wasser heds waege Leitigsbruech es paar Taeg nur selte geh.
Sit 3 Taeg isches zum Glueck wieder relativ troche
und de Staat hed scho viel Hilf geh und no meh versproche.

Chli stupid, ha daenkt ich cha mit minere Reis en schwiizer Winter umgah
und jetzt hani fascht taeglich en Schal und e Chappe a =)
Bsunders ide Nacht waeri ume Heizig froh,
aber das isch natuerlich ned ueblich doh.
Ich cha mich aber mit allem sehr guet arrangiere,
freu mi jedoch de wieder, weni dehei vo minere Daunedecki cha profitiere.
Aber das hed jetzt no es Wiili Zyt,
zum, Glueck, wils da no viel z'entdecke git .

So, hoffe ihr hend au fuer mich chli d'Fasnacht gnosse
bi ues isch nur viel Wasser gflosse:
Am Sunntig hend naemlich alli mit Wasserballoen usw. um sich gschosse!
So isch da de Fasibruch und mer weiss nie,
wie vielmal mer sich a dem Tag muss hei go umzieh =)

Muchos saludos de Cusco
petra

25. Dezember 2009

29. November 2009

Wenn ich schon den Bericht vom Skiweekend damals nicht verfasst habe, gibts hier dafuer was Gereimtes von der Ferne =)

VOM BACKPACKER ZUM LUXUSTOURIST...